Piperazinni modifikatsiyalash orqali CO2 gazini yutish xossasini o'rganish

Abstrak

Ushbu tadqiqotda natriy ortosilikat asosida sintez qilingan silikogelni piperazin bilan modifikatsiyalash va olingan materialning fizik-kimyoviy xususiyatlarini baholash maqsad qilingan. Silikogel kislotali muhitda gel hosil qilish, yuvish va termik ishlov berish bosqichlari orqali sintez qilindi. Shundan so'ng piperazin yordamida funksionallashtirildi. Modifikatsiyalangan namunaning tuzilishi va termik xossalari IQ-spektroskopiya hamda TGA-DTA usullari yordamida o'rganildi. FTIR tahlilida 1047,35 va 800,46 sm-1 sohalardagi signallar Si-O-Si karkasining saqlanganligini, 1562,34 sm-1 dagi signal esa piperazin tarkibidagi N-H guruhlari bilan bog'liq tebranishlarni ko'rsatdi. 1458,18 va 1388,60 sm-1 sohalardagi signallar piperazin halqasidagi -CH2- guruhlarining deformatsion tebranishlari bilan izohlandi. TGA–DTA natijalarida 70-180 °C oralig'ida nisbatan yuqori termik barqarorlik, 180-300 °C oralig'ida esa asosiy termik o'zgarishlar qayd etildi. Ushbu jarayonlar piperazinli funksional markazlarning CO2 bilan o'zaro ta'siri va yuqori haroratda bog'langan shakllarning dissotsiatsiyasi bilan bog'liq bo'lishi mumkin. Olingan natijalar piperazin bilan modifikatsiyalangan silikogelning CO2 ni adsorbsiyalash uchun istiqbolli sorbent sifatida qo'llanish imkoniyatiga ega ekanligini ko'rsatdi.